Eth Conselh Generau d’Aran a trauès de “Prácticum ODISSEU” aufrís era possibilitat a estudiants universitaris de realizar practiques universitàries remunerades de “Open Data Project Manager” damb ua durada de 300 ores e data d’inici prevista entath 16 de junhsèga de 2018.
Es prètzhèts a realizar seràn: redaccion, dessenh, estructuracion e creacion d’un procediment Open Data. Recèrca, recuelhuda e tractament de donades publiques e privades. Traspàs a formats open source des donades obtengudes en un portau web especific de Donades Dubèrtes.
Es practiques se dirigissen a estudiants matriculadi en: Informatica, Enginheria, Telecomunicacions, Multimèdia, IT, IoT, Comunicacion o similara damb era capacitat de poder amiar a tèrme er objècte dera bèca. Tanben s’avaloraràn coneishements en tractament de donades, open source, ofimatica, dessenh web, comunicacion e gestion procedimentau.
Eth projècte ODISSEU ei impulsat pera Direccion Generau de Desvolopament Rurau deth Departament d’Agricultura, Ramaderia, Pesca e Alimentacion (DARP) e era Direccion Generau de Joenessa deth Departament d’Ahèrs Sociaus e Familhes dera Generalitat de Catalonha, a compdar d’ua iniciatiua conjunta dera Fondacion deth Mon Rurau e dera Associacion d’Iniciatiues Ruraus de Catalonha, damb era collaboracion des Grops d’Accion Locau Leader de Catalonha e eth hilat de professionaus de joenessa.
ODISSEU a er objectiu iniciau de fomentar eth retorn enes zònes ruraus d’origina a joeni formadi, a trauès deth contacte e era implicacion des principaus agents que subervien ena sua transicion: es universitats e centres de formacion, es enterpreses locaus, es institucions e administracions qu’intervien enes politiques de desvolopament rurau, d’emplec e de creacion d’enterpreses e de joenessa.
Eth “Prácticum ODISSEU” ei ua iniciatiua que promò es practiques universitàries en enterpreses deth mon rurau damb er objectiu de fomentar er arraïtzes dera joenessa en territòri e frenar era despoblacion des municipis, sustot des airaus ruraus deth país, enes franges juveniles. Entad açò, met en contacte eth teishut empresariau deth territòri damb es joeni estudiants entà que poguen obtier era prumèra experiéncia professionau en sòn territòri rurau d’origina.
Enes dues edicions anteriores des “Ajudes ath Prácticum ODISSEU”, un totau de 55 joeni an pogut realizar es sues practiques en sectors e àmbits de trabalh tan diuèrsi coma eth torisme, era enginheria industriau, era comunicacion e era economia. Enguan, eth “Practicum” aufrís enquia un maximal de 45 aufèrtes de practiques universitàries remunerades.
En aguest sens eth Conselh Generau d’Aran a aprovat recentaments eth Programa “Oficina de Govèrn Dubèrt” que preten èster era palanca de cambi organizatiua, metodologica, procedimentau e tecnologica qu’artenhe un melhor, mès eficient e mès eficaç servici telematic ara ciutadania. Aguesta accion, enquadrada laguens deth programa de govèrn mencionat, preten èster er inici d’un trabalh mès prigond que hèsque deth concèpte “Donades Dubèrtes” un nau paradigma de trabalh public ath servici dera ciutadania, des entitats sociaus e culturaus e es enterpreses, atau coma, un estrument que permete eth desvolopament de naui concèptes, naua gobernança e mès participacion ciutadana.
Ath delà des joeni interessadi en hèr practiques, eth programa tanben se dirigís ath collectiu empresariau deth mon rurau deth país, que poderà corbir era sua aufèrta de practiques gràcies as candidats deth “Prácticum ODISSEU”. Eth dessenh deth programa permet qu’aguestes enterpreses poguen accedir a candidats damb formacion superiora. Un hèt que les ajude a incrementar era sua competitivitat empresariau.
Es estudiants universitaris interessadi ena realizacion des practiques se pòden meter en contacte damb era Oficina de Joenessa deth Conselh Generau d’Aran en: https://www.joenessa.org/contacte/
Tota era informacion sus es practiques: https://www.joenessa.org/wp-content/uploads/2018/04/Formulari_arca_empreses2-2.pdf
Tota era informacion sus “Prácticum ODISSEU” en: www.odisseujove.cat
