Vielha, 1 de junh de 2018.- Tecnics de Joenessa dera Generalitat de Catalonha e dera Oficina de Joenessa deth Conselh Generau d’Aran an organizat ua jornada de dinamiques de grop entà auançar ena elaboracion deth Plan Locau de Joenessa der Ajuntament de Vielha e Mijaran.
Ena jornada an compdat damb era participacion d’ua vintea de joeni de diuèrses associacions de Vielha coma eth Club d’Espòrts de Gèu Val d’Aran (CEGVA), era Associacion Esportiua der INS d’Aran e eth Centre Juvenil e Esplai Aran-Thal.
Era Jornada l’an realizat es tecnics de joenessa dera coordinacion territoriau de Lhèida e era tecnica dera Oficina de Joenessa dera Val d’Aran, Estefania Revilla, entà conéisher es besonhs qu’an es mès joeni e poder aufrir-les un Plan Locau de Joenessa que contemple ua aufèrta d’accions ara nautor des sues inquietuds.
Eth Plan Locau de Joenessa, que nèish d’un convèni de collaboracion signat entre eth Conselh Generau d’Aran e er Ajuntament de Vielha e Mijaran, que compartiràn era figura dera tecnica de joenessa entà amià’c a tèrme, ei previst que sigue finalizat aguest estiu. Eth Plan qu’aurà ua vigéncia de 3 ans, enquia 2021, includirà tanben es critèris de gestion deth Centre Joen de Vielha qu’ei previst qu’entre en foncionament a fins d’enguan 2018.
