Vielha, 11 de deseme de 2018.- 175 alumnes de 1èr e 2au d’ESO der IES d’Aran presencièren e participèren ager ena representacion dera òbra de teatre “Que sí, vida!” a cargue dera companhia Teatracció ena sala Era Audiovisuau de Vielha, en ua jornada sus prevencion des ITS, eth VIH/sida e era sensibilizacion afectiva-sexuau, organizada pera Oficina de Joenessa deth Conselh Generau d’Aran damb eth supòrt deth Departament de Salut dera Generalitat de Catalonha.
Era òbra de teatre “Que sí, vida!”, ei un recors educatiu eficient e fòrça experimentat, qu’a er objectiu de completar e estimular es accions e es programes de promocion dera salut que trabalhen era prevencion e era sensibilizacion en aguesti àmbits, e que produsís un impacte emocionau enes joens.
En aguest sentit, cau tier en compde qu’eth teatre ei un recors efectiu que permet trabalhar era prevencion d’ua manèra mès pròplèu, er hèt de representar ua petita òbra a on se parle de malauties de transmission sexuau, VIH e educacion afectiva sexuau permet as joens identificar situacions e comportaments de risc e posterioraments debàter ath torn des madeishi. “Que sí, vida!” Permet a trauès dera interaccion entre actors e joeni espectadors completar era informacion qu’arreceben aguesti darrèri.
Teatracció trabalhe des de hè ans ena creacion de projèctes educatius de teatre non convencionau, adreçadi especificaments ath collectiu joen. Er objectiu d’aguesti projèctes ei utilizar eth potenciau deth teatre entà fomentar e potenciar es actituds e abituds saludables des joens, orientadi a previer e redusir es risqui sanitaris e psicosociaus que les afècten.
